- Ils pilots tudestgs da la societad aviatica fan chauma il venderdi.
- Clamà a la chauma ha il sindicat «Vereinigung Cockpit».
- Er ils pilots en Belgia, l'Ollanda, l'Irlanda e la Svezia vulan far chauma.
La chauma dals pilots ha cumenzà il venderdi las 03:01 e duai cuzzar enfin sonda las 2:59. La societad aviatica irlandaisa ha annunzià da stritgar radund 400 dals totalmain 2'400 sgols en l'entir'Europa, da quai 250 en Germania. Tenor Ryanair èn radund 55'000 passagiers pertutgads directamain da la chauma dals pilots. Ils pilots pretendan dapli paja e meglras cundiziuns da lavur.
Sgols en Svizra
En Svizra sgola Ryanair da Basilea a Dublin, Londra e Palma de Mallorca. I sa tracta da diesch sgols per emna. Sche quels sgols èn er pertutgads da la chauma actuala, n'è betg cler. Ils passagiers pertutgads vegnian infurmads persunalmain via e-mail u sms.
Segunda chauma aifer curt temp
Gia avant duas emnas aveva la societad aviatica stuì stritgar tschients da sgols. Quai pervi dad ina chauma dals flight attendants en Spagna, il Portugal e la Belgia.
RR novitads 15:00