Il president russ Wladimir Putin fa ina visita da surpraisa sin la peninsla da la Crim. Sin la peninsla annectada il 2014 da la Russia sa scuntra Putin cun il cussegl da segirezza russ.
La visita sin la Crim succeda durant in temp da novas tensiuns tranter la Russia e l'Ucraina. L'emna passada aveva la Russia rinfatschà a l'Ucraina d'avair attatgà schuldads russ sin la Crim ed augmentà sias attatgas en l'Ucraina da l'ost. L'Ucraina aveva refusà questas pretaisas e mess sias truppas al cunfin cun la Russia en prontezza d'alarm.
