Siglir tar il cuntegn
Inhalt

Exteriur Putin renfatscha a Tirchia da far fatschentas cun Stadi Islamic

La dispita tranter la Tirchia ed la Russia s’intensivescha, suenter che la Tirchia ha sajettà giu in aviun d’armada da la Russia. Uss renfatscha la Russia a la Tirchia da vender ieli e benzin a la gruppa da terror Stadi Islamic.

Il president russ Wladimir Putin.
Legenda: Putin cuntinuescha a refusar il giavisch d’Erdogan per in inscunter bilateral. Keystone

La Tirchia haja sajettà giu l’aviun russ per proteger furniziuns d’ieli per il Stadi Islamic (SI), ha ditg il president russ Wladimir Putin a l’ur da l’inscunter dal clima a Paris.

Bler da l’ieli che deriva da regiuns controlladas dal SI e d’autras organisaziuns terroristicas vegnia exportà en la Tirchia, ha ditg Putin.

Demissiun tar mussament

Il president tirc Recep Tayyip Erdogan è sa vilentà sur da questas renfatschas davart da la Russia. Tenor el n’haja la Tirchia nagin traffic commerzial cun terrorists.

Ed el ha accentuà si’innocenza: sch’ins pudess mussar si che la Tirchia fetschia fatschentas cun il SI, lura vegnia el a sa retrair sco president. Quai rapporta l’agentura da novitads Anadolu.

RR novitads 06:00