La disgrazia è succedida en la citad da Kayseri, cura ch’in auto chargià cun material explosiv è explodì precis en il mument ch’in bus militar è passà. Quai ha communitgà l’agentura da pressas tirca Dogan. Purtrets da televisiun mussan in bus reducì ad ina ruina che fima.
La schuldada aveva survegnì il permiss da bandunar lur stabiliments militars per il di, ha declerà l’armada tirca en in communitgà.
Ultim attentat mo avant in'emna
L’explosiun capita in’emna suenter in attentat da bumba dubel avant il stadion da ballape dad Istanbul. Lura era vegnidas 40 persunas per la vita ed ina tschientina è vegnida blessada. Ina gruppa colliada cun la partida dals lavurants PKK, ils falcuns per la libertad dal Kurdistan TaK, aveva sa declerada responsabla quella giada.
Adina puspé attentats en Tirchia
La Tirchia è vegnida tutgada durant quest onn da divers attentats mortals, rinfatschads a la gruppa da terror Stadi Islamic IS ed a diversas gruppas armadas curdas. Kayseri, ina da las citads principalas en il center da la Tirchia, è in center industrial, nua ch’i na succedian tenor las agenturas betg savens attentats.
RR novitads 08:00
