L'agentura da rating americana «Standard & Poor's» (S&P) quinta che l'economia publica svizra creschia vinavant fin il 2020 – quai da moda moderada. Quai surtut tras la dumonda internaziunala per rauba e prestaziuns da servetsch da la Svizra. Il product intern brut vegnia a crescher quest onn per 1,1%, e l'onn che vegn per 1,7%, quinta S&P. La bonitad maximala saja però era duida a la situaziun finanziala solida dal stadi e la cumpetitivadad da la Svizra, communitgescha S&P.
Ristgs: Franc svizzer e relaziuns cun l'UE
Il suletg ristg saja il curs dal franc svizzer. Sche quest vegnia sut squitsch, possia quai avair consequenzas en l'economia reala - però era en il sectur da finanzas. Explicitamain numna l'agentura da rating era l'impurtanza da las relaziuns cun l'Uniun europeica (UE) per la Svizra. E là surtut l'access e la recrutaziun da persunal en il martgà europeic.
RR novitads 09:00