Siglir tar il cuntegn
cuntegn

Exteriur Puigdemont vul cuntinuar las stentas per l'independenza

Il schef da la regenza dals Catalans Carles Puigdemont ha annunzià da cuntinuar cun las stentas per l'independenza da la Catalugna. En in pled en la televisiun ha el fatg in appel als burgais

Mariano Rajoy suenter ses pled en il senat a Madrid.
Legenda: Mariano Rajoy suenter ses pled en il senat a Madrid. Keystone

Dapi sonda a bun’ura è la Catalugna uffizialmain sut administraziun giudiziala. Il primminister Mariano Rajoy ha uffizialmain surpiglià las fatschentas dal president relaschà Carles Puigdemont. Er il rest dal cabinet catalan è uss uffizialmain relaschà. Quai suenter la publicaziun en igl fegl uffizial. Tranter las mesiras tutga era la liquidaziun dal parlament da Barcelona e la preparaziun da novas elecziuns. Quellas duain gia vegnir fatgas ils 21 da december. Rajoy ha suttastritgà che questas mesiras sajan necessarias per restabilir l'urden public en la regiun.

Praschun per Puigdemont?

La procura publica spagnola ha annunzià ina procedura encunter il president regiunal da la Catalugna - Carles Puigdemont - quai pervia da rebelliun. La procura vegnia a purtar plant l'auter emna, hai num da Madrid. Sin rebelliun stat in chasti maximal da 30 onns praschun.

Tut è i fitg svelt

Dapi sonda a bun'ura ha il primminister Mariano Rajoy surpiglià uffizialmain la controlla en la Catalugna. La regenza ed il parlament catalan vegnan schliads. Novas elecziuns duain vegnir fatgas gia ils 21 da december.

Il senat spagnol aveva ier approvà d'activar l’artitgel 155 da la constituziun. Questa decisiun ha pussibilità da privar la regenza regiunala da la pussanza e da fixar novas elecziuns il december. Uss po il primminsiter spagnol Mariano Rajoy cumbatter cun maun dir l'independenza da la Catalugna.

Parlament catalan ha votà per l’independenza

Cuort avant ha il parlament catalan votà per l'independenza da la Spagna. En ina votaziun secreta han ils represchentants a Barcelona decidì da separar la regiun autonoma da la regenza centrala a Madrid. Avant la votaziun han ils parlamentaris conservativs spagnols, ils socialists ed ils liberals bandunà la sala.

RR novitads 17:00++