Siglir tar il cuntegn
cuntegn

Exteriur Puigdemont vegn liber per immediat

Carles Puigdemont vegn liber per immediat. El na dastga però betg bandunar la Germania.

Carles Puigdemont.
Legenda: La gievgia saira aveva la dretgira decidì che Carles Puigdemont duai vegnir liber. Keystone

L'anteriur schef da la Catalugna Carles Puigdemont vegn liber per immediat. Quai grazia ad in pajament da 75'000 euros. Davart ses lieu da segiurn na vegnia fatg naginas indicaziuns, ha declerà l'autoritad.

Relaschà arrest ma betg executà

La Spagna aveva pretendì l'extradiziun dal separatist. La dretgira è dentant da l'avis ch'ina extradiziun na saja betg legitima pervi da la renfatscha da «rebelliun».

In pau auter vesa la dretgira la renfatscha da «corrupziun». En tals cas saja pussaivel da relaschar in cumond d'arrest per l'extradiziun. E quai ha la dretgira er fatg. Perquai che las renfatschas na sajan dentant betg uschè grevas, ha la dretgira mo relaschà il cumond e n'ha betg executà el. Uschia che Puigdemont po vegnir liber sut tschertas cundiziuns.

Renfatscha da corrupziun

Las autoritads spagnolas pretendan che Puigdemont haja defraudà daners en valita da pli che 1,5 milliuns francs en connex cun il referendum d'independenza da la Catalugna.

Pervia d’in cumond d’arrest europeic è Puigdemont vegnì arrestà al cunfin tranter la Germania ed il Danemarc ils 25 da mars.

Puigdemont vul dialog

Suenter che Carles Puigdemont è vegnì liber ord la praschun ha el pretendì ch'era ulteriurs concumbattants arrestads vegnan libers.

Puigdemont ha er appelà a la regenza spagnola ch'i saja uss temp per in dialog. I na dettia nagina legitimaziun per betg entrar en discurs per schliar il conflict, uschia Puigdemont.

RR novitads 20:00