Siglir tar il cuntegn

Exteriur Puigdemont resta en Germania

In di suenter che Puigdemont è vegnì relaschà da la praschun è el sa preschentà a Berlin a las medias.

Puigdemont la sonda a Berlin avant las medias.
Legenda: Carles Puigdemont la sonda a Berlin avant las medias. Keystone

L'anteriur president regiunal da la Catalugna ha declerà avant las medias a Berlin, ch'el vegnia a restar en Germania fin che la procedura giuridica cunter el saja terminada. El guardia quai sco sia obligaziun da star a disposiziun a las autoritads. Cura che la procedura saja serrada giu, veglia el returnar en Belgia.

Puigdemont ha appellà a la regenza spagnola d'entrar en in dialog politic cun ils represchentants da la Catalugna. A medem temp ha el intimà la regenza centrala da respectar la democrazia. I saja necessari e correspundia a la lescha da furmar ina regenza regiunala da la Catalugna.

Suenter var duas emnas en praschun ha la giustia tudestga laschà liber Puigdemont il venderdi sut cundiziuns. Ord vista da la Spagna ha il politicher catalan cuntrafatg a la constituziun cun laschar vuschar davart l'indipendenza da la Catalugna.

RR novitads 14:00