Il schef da la regenza catalana Carles Puigdemont ha renfatschà in putsch a la regenza centrala a Madrid. Cun quai ha el reagì sin l’annunzia dal schef da la regenza spagnola Mariano Rajoy, che la pussanza vegnia prendida davent a la regenza regiunala e ch’i duai dar novas elecziuns en Catalugna.
Las mesiras da Madrid sajan in’attatga inacceptabla sin la democrazia, ha ditg Puigdemont. Quai saja la mendra attatga cunter la Catalugna dapi la dictatura da Franco. Il parlament catalan duaja sa reunir per discutar davart las mesiras che Madrid ha annunzià.
450'000 persunas sin via
Tenor indicaziuns da la polizia han la sonda saira radund 450'000 persunas protestà cunter la regenza centrala a Madrid. Manà la demonstraziun ha Carles Puigdemont. Ils demonstrants han protestà cunter las mesiras da la regenza centrala ed han pretendì che la libertad per dus activists ch'eran vegnids arrestads l'emna passada.
RR novitads 06.00