Siglir tar il cuntegn
Inhalt

Exteriur Puigdemont na vul nagin asil en la Belgia

Il president regiunal catalan destituì Carles Puigdemont n’è betg viagià en la Belgia per dumandar asil politic. Quai ha el ditg il mardi tar ina conferenza da medias a Brüssel. E Puigdemont vul respectar ils resultats da l'elecziun regiunala, che la regenza spagnola ha fixà per ils 21 da december.

Carles Puigdemont durant ina conferenza da medias
Legenda: Carles Puigdemont durant sia conferenza da medias a Brüssel mardi da mezdi. Keystone

A la conferenza da medias ha Puigdemont ditg, ch'el na veglia betg sa zuppar da la giustia spagnola. Sch'el survegnia tschertas garanzias returnia el en la Catalugna.

Il medem mument ha Puigdemont appellà da franar las stentas sin la via vers in’independenza da la Catalugna. I na saja betg pussaivel da fundar ina republica per tuts sin ina basa violenta, ha el ditg. E sche quai muntia ch’il svilup en direcziun daventar independent daventia pli plaun, lura saja quai in pretsch raschunaivel.

Belgia betg intgantada

Critica per il viadi da Puigdemont en la Belgia ha exprimì il vice-primminister dal pajais, Kris Peeters. Cura ch’ins proclameschia l’independenza, saja meglier da restar datiers dal pievel, ha Peeters ditg ad in emettur beltg.

Puigdemont ha contact cun advocat spezialisà

Il glindesdi saira era vegnì conuschent, che Carles Puigdemont saja viagià en la Belgia ed haja discurrì cun in advocat spezialisà per dretgs umans en Belgia. Tenor l'advocat Paul Bekaert haja el gì in emprim contact cun Puigdemont. Bekaert ha gia defendì commembers supponids da l'organisaziun clandestina basca ETA, ed ha pli che 30 onns experientscha cun dumondas da l'extradiziun e da l'asil politic da Bascs da la Spagna.

RR novitads 14:00