Siglir tar il cuntegn
Inhalt

Exteriur Proxim Orient: Trais dis malencurada naziunala

Suenter l'escalaziun da violenza al cunfin tranter l'Israel e la Strivla da Gaza ha il president palestinais, Mahmud Abbas, ordinà ina malencurada da trais dis.

Persunas che s'embratschan.
Legenda: En Ia Strivla da Gaza ed la Cisjordania han ils trais dis da malencurada cumenzà. Keystone

Per mardi ha il president palestinais, Mahmud Abba, clamà ina chauma generala. Las ultimas emnas han dieschmillis protestà per ina fin da la bloccada dal Gaza e per in dretg da pudair turnar en il territori dal stadi israelian dad oz. Questas protestas en massa duain finir mardi.

Protest al cunfin dal Gaza.
Legenda: Las protestas en massa al cunfin tar il Gaza duain finir mardi. Keystone

Reacziuns

Ulteriuras reacziuns sin ils passa 50 morts hai dà tranter auter dal president tirc Recep Tayyip Erdogan che ha numnà l'agir da l'Israel sco genocid. Quai annunzia l'agentura da novitads statala tirca Anadolu.

Ils Stadis Unids da l'America refusan entant in'inquisiziun independenta da las confruntaziuns. Ils Palestinais ed ils Israelians dattan viceversa in a l'auter la culpa da l'escalaziun.

Dumber da morts e blessads è s'augmentà

Il dumber da morts tar las dispitas violentas en la Strivla da Gaza al cunfin cun l'Israel è s'augmentà sin 59. Ina mattatscha dad otg mais saja stenschida suenter ch'ella haja inhalà gas lacrimogen ch'ils schuldads israelians hajan duvrà. Quai communitgescha il ministeri da sanadad a Gaza. Il dumber da Palestinais blessads è passa 2'770, la mesadad haja blessuras da sajets.

RR novitads 06:00