Siglir tar il cuntegn

Exteriur Proxim Orient: Guterres pretenda fin da las ostilitads

Suenter la confruntaziun tranter l'Israel e l'Iran pretenda il secretari general da l'ONU Antonio Guterres in stop da las acziuns militaras. Quai scriva l'agentura da novitads svizra SDA.

Secretari general da l'ONU Antonio Guterres.
Legenda: Secretari general da l'ONU Antonio Guterres. Keystone

Suenter che las tensiuns en il Proxim Orient èn creschidas avertescha il secretari general da l'ONU Antonio Guterres d'ina dinamica betg controllabla en la regiun. Guterres haja legì cun fitg grond fastidi da las attatgas sin il Plateau dal Golan ed en la Siria la notg passada, ha ditg il pledader dal secretari general. El pretenda perquai:

Ina fin immediata da tut las ostilitads.
Autur: Antonio Guterressecretari general da l'ONU

L'ambassadur israelian da l'ONU Danny Danon pretenda da Guterres ed il Cussegl da segirezza da l'ONU da condemnar l'attatga da rachetas da l'Iran sin il Plateau dal Golan. L'agir agressiv da l'Iran stoppia vegnir sentenzià.

Iran snegà d'esser culpabel

L'Iran percunter ha snegà che sias truppas sajan stadas involvidas en las attatgas cun rachetas sin il Plateau dal Golan. L'Israel dovria inculpaziuns inventadas e senza basa per giustifitgar sias attatgas sin miras en la Siria. Quai ha ditg in pledader dal ministeri da l'exteriur iranais.

Tenor indicaziuns da l'Israel avevan truppas iranaisas staziunadas en la Siria attatgà posiziuns israelianas sin il Plateau dal Golan. Sinaquai aveva l'Israel attatgà basas militaras da l'Iran en la Siria.

RR novitads 06:00