En vista a la dispita da l'UE davart la crisa da fugitivs ha l'incumbensada per l'exteriur, Federica Mogherini, avertì che l'Uniun Europeica perdia da sia reputaziun. «Nus stuain esser verdaivels e far entaifer noss cunfins quai che nus pretendain ordaifer noss cunfins» ha ditg Mogherini. «En autras parts dal mund emprovia la UE da far reclama per nossas valurs», ha ditg Mogherini envers la «Süddeutsche Zeitung». «Quai na funcziuni betg sch'in na grategia betg a chasa da mussar respect avant las minoritads, per exempel il respect avant ils muslims» uschia Mogherini.
Oz, mesemna, emprova da chattar ina schliaziun pratitgabla en la crisa da fugitivs. Ch'ins na po betg far endretg a tuts ha mussà l'inscunter dals ministers da l'intern.
A l'inscunter suprem è la crisa da fugitivs la tractanda la pli impurtanta. Tenor il president Donald Tusk vai per proteger meglier ils cunfins da l'UE e da stabilisar la situaziun en ils territoris da guerra e crisa ordaifer l'UE. Per exempel duai la Tirchia survegnir fin ina milliarda euros per l'agid da fugitivs.
RR novitads 06:00/14:00