Siglir tar il cuntegn
Inhalt

Exteriur Privel d'ina soluziun da dus stadis a Jerusalem

La Guatemala suonda sco emprim pajas a la decisiun da Trump da renconuscher il Jerusalem sco chapitala da l'Israel. Guatemala mida pia l'ambassada da Tel Aviv a Jerusalem. Ulteriurs pajais pudessan suandar.

Dunna vegn da scala giu. Davos Munt dal Tempel.
Legenda: Munt dal Tempel ad Israel (maletg da simbol). Keystone

Il primminister da l'Israel Benjamin Natenjahu è cuntents cun la decisiun da Guatemala. Da Nadal ha il president da Guatemala Jimmy Morales fatg attent a las bunas relaziuns tranter ils dus stadis dapi che Guatemala ha sustegnì la fundaziun dal stadi israelian. Guatemala è l'emprim pajais ch'è suandà a la decisiun da Trump.

La midada d'ambassadas da Tel Aviv a Jerusalem pudess rinforzar la pretaisa da l'Israel sin l'entir Jerusalem. Critichers temian plinavant che talas decisiuns dals Stadis Unids u da Guatemala pudessan bloccar ina soluziun d'ina citad cun dus stadis ed in stadi palestinais.

Auters pajais pudessan suandar

Sco la viceministra per l'exteriur da l'Israel Zipi Chotoveli a ditg al radio israelit, saja la decisiun da Guatemala da midar l'embassada a Jerusalem pir l'entschatta. Ella spetgia ch'er auters pajais fetschian quest pass. L'Israel discurria cun pli che 10 pajais da midar l'ambassada. Nums na leva Chotoveli dentant betg numnar.

Tenor l'agentura da novitads svizra SDA scriva la gasetta israelita «Haaretz» sa referind a diplomats israelits che Honduras pudess era suandar a Guatemala. Il radio israelit rapporta che Israel saja sper Honduras era cun la Rumenia, las Filippinas ed il Sudan dal Sid en discurs. Da concretas tractativas possian ins dentant anc betg discurrer.

A la radunanza plenara èn Guatemala, Honduras e tschintg ulteriurs pajais sa colliads cun ils Stadis Unids ed Israel ed han vuschà cunter la resoluziun betg lianta.

RR novitads 06:00

Jerusalem

Ils Palestinais pretendan ina part da l'ost da la citad da Jerusalem sco chapitala din pajais independent futur. L'Israel aveva conquistà il 1967 durant la guerra da sis dis e silsuenter annectà la citad.