Siglir tar il cuntegn

Exteriur Primminister ucranais Arseni Jazenjuk sa retira

Il primminister da l’Ucraina Arseni Jazenjuk sa retira da ses uffizi. Quai ha el annunzià en in pled a la televisiun. Cun quest pass fa Jazenjuk via per ina nova regenza.

Il primminister ucranais Arseni Jazenjuk sa retira.
Legenda: Il primminister ucranais Arseni Jazenjuk sa retira. Reuters

Suenter bunamain dus mais crisa da regenza en l’Ucraina ha il primminister Arseni Jazenjuk annunzià sia demissiun. Il parlament ucranais duaja decider il mardi sur da la demissiun da Jazenjuk, ha confermà sia pledadra a Kiew.

Corrupziun e refurmas retardadas

En in pled a la televisiun ha Jazenjuk numnà la crisa politica da la regenza sco ina da las raschuns per sia decisiun. La discussiun enturn sia persuna haja bloccà da sa fatschentar cun las midadas necessarias en il pajais.

Jazenjuk è dapi mais sut squitsch. Da sia regenza da coaliziun èn sortidas pliras partidas. Plinavant han cumbats da pussanza aifer la coaliziun sco er scandals da corrupziun impedì da realisar las refurmas ch’il vest pretenda. Quai blocheschia er las contractivas davart novs credits dal fond monetar internaziunal en l’autezza da 1,7 milliardas francs.

Dapi la midada da pussanza en l’Ucraina la primavaira 2014 manava Jazenjuk la regenza. Durant ils ultims mais era la relaziun cun il president Petro Poroschenko dentant vegnida mendra.

Il favrer aveva ina nunreelecziun da Jazenjuk fatg naufragi avant il parlament. Er deva quai nagin consens tgi che duess daventar successur. Entant duai la partida per il vest esser sa cunvegnida per Wladimir Groisman sco nov schef da la regenza.

RR novitads 16:00