Siglir tar il cuntegn
Inhalt

Exteriur Primminister canadais visita Fort McMurray

Il primminister canadais Justin Trudeau ha visità la citad Fort McMurray ch’è per part vegnida destruida d’in fieu da guaud. Ils donns èn pli pitschens che temì, en il quartier Beacon Hill èn dentant be pli da chattar ruinas.

La primministra da la provinza Alberta Rachel Notley ed il primminister canadais Justin Trudeau entamez las ruinas.
Legenda: La primministra da la provinza Alberta Rachel Notley ed il primminister canadais Justin Trudeau entamez las ruinas. Keystone

En il Canada ha il primminister Justin Trudeau visità la citad da Fort McMurray en la provinza d’Alberta. Pervi da grevs incendis han ils radund 80’000 abitants stuì vegnir evacuads l'emna passada. Parts da Fort McMurray èn vegnidas destruidas dal tuttafatg.

Da sia visita ha il primminister ludà la prestaziun da las forzas d’intervenziun. Als abitants da la citad destruida ha Trudeau empermess da far tut per ch’els possian turnar a chasa uschè spert sco pussaivel. El ha garantì in grond agid finanzial per la reconstrucziun.

Fort McMurray pli pauc donnegià che temì

Suenter ils grevs incendis da guaud en il Canada para la citad Fort McMurray d'esser vegnida donnegiada pli pauc che temì. Tenor la regenza da la provinza haja 90% da la citad cun radund 80'000 abitants pudì vegnir liberada.

chasas destruidas dal fieu a Fort McMurray
Legenda: Malgrà tut la destrucziun han 90% da la citad Fort McMurray pudì vegnir liberà. Keystone

Ils fieus hajan destruì circa 2'400 chasadas, 25'000 sajan anc intactas, tranter quellas era ospitals, edifizis municipals e scolas. Il fieu actual haja destruì pli pauc ch'il fieu enturn Slave Lake l'onn 2011.

Sur d’in return da las persunas evacuadas na po il mument betg vegnir discutà, l’emprim stoppia l’infrastructura sco il provediment d'aua, gas ed electricitad vegnir reparada.

RR novitads 06:00 / 14.05.2016 - 11:00