Il chancelier federal austriac Sebastian Kurz ha confermà las restricziuns vers l'agentura da novitads austriaca APA. Gia la dumengia dettia quai controllas da polizia cun l'incumbensa da trametter a chasa gruppas pli grondas che sa radunian en la publicitad – sco per exempel sin ina plazza da gieus. A partir da glindesdi pedessia quai era dar multas da fin € 2000.-, communitgescha l'uffizi dal chancelier. Anc pli rigurus è s'exprimì il Tirol:
Senza raschuns stringentas na dastga nagin bandunar sia abitaziun.
Sco raschuns stringentas han precisà Kurz e Platter:
- lavurs indispensablas (tut tenor professiun)
- far cumissiuns necessarias (victualias, medicaments, ir per daners)
- agid per autras persunas
L'Austria sa distatga da la Svizra
Il ministeri digl exteriur austriac renda attent da betg viagiar en Svizra, e ch'ils cumpatriots en Svizra duain turnar a chasa. Quai ha communitgà il Departament federal per affars exteriurs EDA suenter in discurs telefonic dal minister da l'exteriur svizzer Ignazio Cassis cun ses collega d'uffezi. Sper la Svizra avertescha l'Austria era da viadis en Frantscha ed en Spagna.
Il Cussegl federal cusseglia da desister il mument da tut ils viadis en l'exteriur che n'èn betg urgents. Il ristg da s'infectar cun il coronavirus dettia quai en tut las regiuns dal mund. Las ambassadas svizras en l'exteriur hajan plinavant il mument mo capacitads restrenschidas per gidar Svizras e Svizzers da turnar a chasa.