La constituziun da la partida communista da la China numna en il futur explicit il num dal president chinais Xi Jinping. Quai han decidì ils var 2'300 delegads al congress da partida a Peking. Fin uss han mo dus antecessurs da Xi l'onur d'esser menziunads cun num en la constituziun da la partida communistica: Quai èn Mao Zedong e Deng Xiaoping.
Cun quai enfermescha Xi sia pussanza en la partida. En la constituziun han ils delegads scrit che las ideas da Xi servan sco guid per la lavur da la partida ch'el maina absolutamain.
Enfirmir la rolla da la China cun controlla da la partida
Quai han decidì ils delegads suenter in pled da trais uras e mesa. Là aveva Xi Jinping preschentà sias ideas e sia filosofia, che la China duai giugar ina rolla pli gronda sin il mund, quai accumpagnà d'ina controlla ferma da la partida - en tut ils secturs da la vita sociala, economica e politica da stadi.
RR novitads 08:00