Siglir tar il cuntegn
Inhalt

Exteriur President Trump perda pledader da ses advocats

Mark Corallo, il pledader dal team d’advocats dal president american Donald Trump, sa retira suenter mo dus mais en servetsch. En sia decleraziun il venderdi n’haja el inditgà naginas raschuns per sia decisiun, rapporta l’agentura da novitads svizra SDA.

Portrait da Trump.
Legenda: Donald Trump ils 19 da fanadur tar ina sesida da sia campagna a favur da products americans, «Made in America». Keystone

Tenor la gasetta americana Politico saja Mark Corallo be stà dus mais en servetsch en il team d'advocats da Trump. Corallo stettia damanaivel a l'investigader spezial Robert Muller e na saja betg cuntent da la tactica dal team Trump, da discreditar Muller.

Reorganisaziun en il team d'advocats da Trump

Ensemen cun autras medias scriva er Politico dal fatg, ch'il team d’advocats da Donald Trump insumma vegnia reorganisà.

Il presidi da Trump stat dapi il cumenzament en l’umbriva dal suspect, che la Russia haja influenzada l’elecziun dal president Trump l’onn passà a favur da quel. La regenza a Moskau refusescha quai dentant.

Umbriva da «Russiagate» è lunga

Er Trump declera vinavant, ch’i na dettia naginas cunvegnas secretas tranter ses team electoral e represchentants russ. Ils servetsch secrets americans percunter èn da l'avis, che la Russia haja interferì tar las elecziuns.

En ils Stadis Unids s’occupan actualmain pliras cumissiuns parlamentaras e l’investigader spezial Robert Mueller da l’affera. Fond allusiun a l’affera da Watergate, ch’aveva custà ils onns 70 il presidi american a Richard Nixon, vegn l’affera er gia numnada «Russiagate».

RR novitads 18:00