Il segund di da la visita da Xi Jinping han represchentants da la China e da la Svizra suttascrit ina ritscha da cunvegnas. Tranter auter han omadus pajais mussà la voluntad da profundar il commerzi liber. La convenziun da commerzi liber funcziuneschia bain. Tuttina dettia anc spazi per meglierar el, ha ditg Doris Leuthard.
Xi Jinping da sia vart ha engrazià per il bainvegni chaud ed amiaivel. La relaziun bilaterala saja ad in nov punct, ha ditg il president chinais suenter sia visita da dus dis. El saja optimistic che las relaziuns tranter la Svizra e la China sa sviluppeschan vinavant.
Doris Leuthard ha menziunà che l'interess dal barat saja vicendaivel. Il Cussegl federal onureschia che la China surpiglia adina dapli responsabladad en bleras sfidas globalas.
Commerci, finanzas, clima, Siria e Proxim Orient…
Il president da la China Xi Jinping è vegnì beneventà la dumengia a Berna dal collectiv dal Cussegl federal. En il center da sia visita da dus dis stattan discurs davart il commerci mundial, il sistem da finanzas global, la protecziun dal clima e la situaziun en la Siria ed il Proxim Orient. Ultra da quai è planisà ina maisa rodunda cun represchentants da l'economia. Il minister da l'economia Johann Schneider-Ammann vul discuttar cun Xi Jinping la dumonda da schlargiar la cunvegna da commerzi liber.
Pled da bainvegni
En ses pled da bainvegni ha la presidenta da la confederaziun Doris Leuthard renvià al partenadi strategic innovativ ch'ils dus pajais han concludì avant in onn.
Plinavant ha ella accentuà la rolla da piunier da la China enten promover in commerzi mundial fair ed avert, sco er en la politica dal clima.
Demonstraziuns a Berna
Da quai da 400 Tibetans da l'exil e lur sustegniders han demonstrà oz a Berna a chaschun da la visita dal president chinais Xi Jinping.
Ils participants da la manifestaziun lubida da l'avantmezdi han pretendì dapli dretg umans en il Tibet e ch'i vegnia cumenzà cun in dialog tranter la regenza chinasa ed il Dalai Lama.
D'ina demonstraziun betg lubida la dumengia suentermezdi èn 14 activists vegnids arrestads.
RR actualitad 17:00 / RR novitads 12:00