Siglir tar il cuntegn
Inhalt

Exteriur President argentin investescha daners dubius en ses pajais

Ils daners che Mauricio Macri ha parcà sin las Bahamas duain vegnir transferids enavos en l'Argentina. Quai sco reacziun sin las renfatschas en connex cun ils Panama Papers.

President argentin.
Legenda: Mauricio Macri investescha ses daners puspè en ses agen pajais. Keystone

Il president da l'Argentina Mauricio Macri vul investir ses daners d'in conto ch’el posseda sin las Bahamas en emprests dal stadi da ses agen pajais. Macri ha ditg ch'ils 1,2 milliuns dollars americans vegnian transferids en l'Argentina. En connex cun ils Panama Papers aveva el concedì d'avair in conto sin las Bahamas. Gia avant emnas era il num da Macri crudà en connex cun l'affera.

Procedura d'inquisiziun

La procura publica aveva sinaquai instradà ina procedura d'inquisiziun cunter il president. I sa tracta da duas societads offshore sin las Bahamas ed en il Panama. Il president sa dosta cunter las renfatschas. El na saja betg stà acziunari da las societads, uschia che quai na saja betg visibel en sias decleraziuns da taglia. Avert resta però, sche Macri ha survegnì indemnisaziuns da las societads e tut tenor betg declerà quellas a las autoritads da taglia.

Ulteriurs politichers e prominents sut squitsch

Medias avevan l’entschatta d’avrigl rapportà da bun 200'000 societads offshore fundadas da la chanzlia d’advocat Mossack Fonseca nua che prominents e politichers da l’entir mund duajan avair zuppà lur facultad.

En consequenza hai dà investigaziuns globalas ed ina debatta davart oasas fiscalas e lavada da daners suspectus. Tranter auter è il primminister da l'Islanda Sigmundur Gunnlaugsson sa retratg. Er il primminister britannic David Cameron ha stuì dar pled e fatg pervi dad ina participaziun ad ina tala societad da ses bab mort.

RR novitads 10:00