Preoccupaziun davart transports russ en Siria

En ils stadis da l'Europa dal Vest ed ils Stadis Unids sa mussan ils politichers preoccupads pervia da las activitads militaras rinforzadas da la Russia en Siria. Gronds aviuns da transport russ portian adina dapli truppas e vehichels en Siria.

Maletg simbolic: Aviun da transport.

Legenda da maletgs: Maletg simbolic: Aviun da transport. Keystone

Las activitads militaras da la Russia sajan uschè intensivas sco anc mai dapi il cumenzament da la guerra civila, citescha l’emettur american Fox-News represchentants da la regenza americana.

Sche quels rapports constetian, procurassi quai per anc dapli violenza en la regiun, ha avertì il minister da l'exteriur american John Kerry. Tant ses collegas d'uffizi tudestg e franzos, Frank-Walter Steinmeier e Laurent Fabius, sco er il secretari general da la NATO Jens Stoltenberg pretendan da chattar ina schliaziun politica e betg militara.

Russia tutga tar ils ultims sustegniders dal reschim sirian

Il ministeri da l'exteriur a Moscau ha declerà che la Russia na zuppentia betg il fatg ch'ins transporteschia armas e tecnica d'armaziun en Siria, quai en il rom da la lescha vertenta. La Russia vala sco in dals ultims stadis che sustegnan il reschim dal president sirian Baschar al-Assad.

RR novitads 07:00