Siglir tar il cuntegn

Exteriur Premi Nobel da litteratura vegn spustà

Pervi da scandals enturn l'Academia svedaisa na vegn surdà quest onn nagin premi Nobel da litteratura.

L'Academia svedaisa a Stockholm.
Legenda: L'Academia svedaisa a Stockholm. Keystone

Quest onn na vegn surdà nagin premi Nobel da litteratura, la premiaziun vegn spustada per in onn. Il premi Nobel 2018 da litteratura vegnia fixà ed annunzià il medem mument sco il premi 2019. Quai ha communitgà l'Academia svedaisa il venderdi a Stockholm.

Accusaziuns da mulestas sexualas e corrupziun

Quai è la consequenza da la crisa en l'Academia svedaisa – l'organisaziun responsabla per il premi Nobel da litteratura. Avant in temp eran vegnidas a la glisch accusaziuns da mulestas sexualas e corrupziun – cunter l'um d'ina commembra da l'Academia svedaisa. Ultra da quai duai la medema commembra er avair decidì sur da daners da promoziun per l'atgna uniun da cultura ed avair tradì ordavant a ses um, ch'è fotograf, il num dals scripturs e scripturas ch'èn vegnids undrads cun il premi da litteratura.

Academia svedaisa

Personen-Box aufklappenPersonen-Box zuklappen

L'Academia svedaisa, «Svenska Akademien», ha en emprima lingia la lezia da promover il linguatg e la litteratura svedaisa. La sedia da l'academia sa chatta a Stockholm. Ella è vegnida fundada il 1786 dal retg Gustav III. tenor l'exempel da l'Académie française. Sin livel internaziunal è l'academia enconuschenta perquai ch'ella elegia il victur dal premi Nobel da litteratura. Dasperas surdat l'Academia svedaisa però er divers ulteriurs premis e stipendis – tranter auter il premi nordic che vala en Scandinavia sco pitschen premi Nobel.

Lavurar vi da la fiduzia da l'academia

Per consequenza han divers commembers da l'Academia svedaisa remess lur uffizi, perquai ch'els n'eran betg cuntents cun l'agir indulgent da l'academia envers il pèr maridà. Actualmain èn be anc 10 da 18 commembers activ en uffizi. Quai che pericliteschia tenor la chasa roiala seriusamain la lavur dal gremi. Uschia ha er il retg Karl XVI. Gustav appellà als commembers da surpigliar responsabladad. L'academia duaja uss lavurar londervi da gudagnar enavos la fiduzia.

RR novitads 10:00