Siglir tar il cuntegn
Inhalt

Exteriur Premi Nobel d'economia va a l'american Richard Thaler

Il scienzià american Richard Thaler cumbina en ses studis economia e psicologia. Thaler ha intercurì la psicologia da decisiuns economicas ed ha fatg l'economia pli umana. Quai communitgescha l'Institut Karolinska a Stockholm.

Richard Thaler.
Legenda: Richard Thaler. Keystone

Richard H. Thaler (72) è docent a l'universitad da Chicago.

Co che la psicologia influenzescha decisiuns economicas

El vegn onurà per sias contribuziuns davart l'influenza da facturs psicologics sin decisiuns economicas. Cunzunt modas da sa cumportar en il mintgadi che n'èn betg adina raschunaivlas han interessà il scienzià.

Uschia ha Thaler per exempel prendì propiests da Bumaun sut la lupa. Plinavant ha el explitgà daco che chaussas ch'ins posseda sez han dapli valur per ins.

Pionier per sia lavur durant 40 onns

Richard Thaler saja in pionier, sch’i sa tractia da duvrar scuvertas da la psicologia en analisas economicas, ha ditg il president dal comité da premi Per Stromberg.

Thaler haja duvrà durant quatter decennis teorias, models, experiments e tests per analisar, co che aspects specifics da la psicologia influenzeschian sistematicamain decisiuns economicas.

RR novitads 12:00

Premi nobel d'economia

Il premi Nobel d’economia na tutga betg tar il premis da Nobel tradiziunals. El è vegnì fundà pir l’onn 1968 da la banca imperiala svedaisa. En il mund da l’economia ha el tuttina il status dad in premi Nobel tradiziunal. Quels han lur ragisch en il testament dal inventader dal dinamit, dad Alfred Nobel, e vegnan surdat dapi il 1901.