Bernie Sanders ha cleramain gudagnà la preelecziun dals democrats en il stadi Wyoming. Il Senatur da Vermont ha survegnì radund 56 pertschient da las vuschs, sia concurrenta Hillary Clinton ha cuntanschì 44 pertschient.
Igl e gia la setavla giada en successiun che Sanders gudogna ina preelecziun cunter l’anteriura ministra da l’exteriur. Ma el n’ha betg pudì cumpensar fitg ses retard. Clinton è anc adina a la testa e resta uschia la favurita dals democrats. Er la victoria a Wyoming porta nagut a Sanders: Las 14 vuschs dals delegads ch’eran da gudagnar là vegnan numnadamain repartidas proporziunalmain al resultat. Quai munta che Sanders e Clinton survegnan mintgamai set vuschs.
7 delegads per Sanders e Clinton
Auter che tar ils republicans vegnan las vuschs dals delegads tar ils democrats adina repartidas proporziunalmain. Clinton rimna pia er lura vuschs sch’ella daventa be segunda. Suenter la preelecziun a Wyoming è Clinton a la testa cun 1’305 vuschs, avant Sanders cun 1’086 vuschs. Per daventar candidat presidial dals democrats èn necessarias 2’383 vuschs da delegads.
Ils 19 d’avrigl è la preelecziun a New York, nua ch’i va per 291 delegads. En il «Big Apple» spera Clinton d’avair in gieu a chasa. La finala è ella stada senatura dal stadi.
Cruz sa segirescha Colorado
Entant ha il multimilliardari Donald Trump incassà in’ulteriura terrada. Ses rival principal Ted Cruz ha segirà la sonda tuts 13 delegads a Colorado. Avant aveva el gudagnà tuttas ulteriuras 21 vuschs dals electurs delegads en ils set districts da quest stadi.
RR novitads 06:00