Praschuniers da Guantanamo transferids en la Ghana

Ils Stadis Unids han transferì dus praschuniers da Guantanamo en la Ghana.

Trais survegliaders da praschun passan giatters da serrada en la praschun da Guantanamo

Legenda da maletgs: En il champ a Guantanamo èn anc adina 105 praschuniers Keystone

Dus praschuniers dal champ dispitaivel Guantanamo èn vegnids transferids en la Ghana. Quai communitgescha il ministeri da defensiun american a Washington. Cun quest «gest umanitar» sustegnia la Ghana las stentas americanas da serrar la praschun dispitaivla sin la Cuba. Là èn anc adina 105 persunas arrestadas.

Ils praschuniers transferids en la Ghana sajan dus umens dal Jemen. Tenor las medias avessan els gì da vegnir libers gia il schaner 2010. La guerra en il Jemen ed obstachels birocratics hajan impedì lur repatriaziun. Ussa ha la Ghana prendì si els.

Suenter las attatgas dals 11 da settember 2001 aveva l'anteriur president George W. Bush laschà endrizzar quest champ a Guantanamo. Cur che ses successur, Barack Obama è vegnì elegì l'onn 2009 ha el empermess da serrar quest champ. Enfin uss n'è quai dentant anc betg grategià pervi da la resistenza en il congress american.

RR Novitads: 6:00