Siglir tar il cuntegn
Inhalt

Exteriur Portugais elegian in nov parlament

Il Portugal elegia in nov parlament l’entschatta d’october, quai ha annunzià il president Anibal Cavaco Silva en in pled a la televisiun. L’elecziun saja da gronda muntada per l’avegnir dal pajais.

Il president porturgais Aníbal Cavaco Silva.
Legenda: Il president Aníbal Cavaco Silva ha fatg reclama da cuntinuar cun il dir program da spargn. Keystone

Cavaco Silva ha fatg reclama da cuntinuar cun il dir program da spargn. Il primminister Pedro Passos Coelho, ch’è dapi 4 onns a la testa da la regenza dal center dretg, candidescha per in’ulteriura perioda d’uffizi. Sco ses pli grond concurrent vala il secretari general dals socialists, Antonio Costa. Sia partida vegn però scurlattada dad in’affera da corrupziun.

Agid finanzial fin il 2014

Per evitar in bancrut dal stadi aveva il Portugal prendì encunter il 2011 agid finanzial dals pajais da l’euro, la banca centrala europeica e dal Fond monetar internaziunal. Dapi lura ha il pajais realisà ina retscha da refurmas e mesiras da spargn. Enfin il 2014 è la situaziun dal pajas lura sa megliurada uschè lunsch ch’ils program d’agid ha pudì vegnir terminà.

RR novitads 06:00