Poroschenko relascha guvernatur - sin agen giavisch

Il president ucranais Petro Poroschenko ha relaschà il milliardari Igor Kolomoiski sco guvernatur da la regiun industriala Dnipropetrowsk.

poroschenko e kolomoiski en stanza represchentativa vid maisa

Legenda da maletgs: Il president ucranais Petro Poroschenko (san.) en discurs cun l'oligarsch Igor Kolomoiski a l'inscunter da mesemna. Reuters

L'oligarch haja dumandà sez per sia relaschada, ha ditg l'administraziun presidiala a Kiew. Kolomoiski vala sco in dals pli impurtants finanziaders da las truppas ucranaisas en il cumbat cunter ils separatists sustegnids da la Russia. Ses possess vegn schazegià cun 1,8 milliardas dollars. L'onn passà aveva Poroschenko mess el sco guvernatur en ina regiun en l'ost da l'Ucraina ch'è ferm influenzada da la Russia.