Siglir tar il cuntegn
Inhalt

Exteriur Polizia ungaraisa ha rumì la staziun a Budapest

En l'Ungaria ha la polizia rumì la staziun en l'ost da Budapest. La polizia impedescha che fugitivs senza in visum valaivel pon ir en ils trens. Uschia sa tegnia l'Ungaria a la cunvegna da Dublin, ha ditg in pledader da la regenza.

La polizia ungarais a la staziun en l’ost da Budapest vi da manar davant ils fugitivs.
Legenda: La polizia ungarais a la staziun en l’ost da Budapest vi da manar davant ils fugitivs. Reuters

La notg passada èn bunamain 2'000 fugitivs arrivads davent da l'Ungaria sur l'Austria fin a Minca en la Germania. En la citad da Rosenheim sajan passa 3'000 fugitivs arrivads.

Er a Buchs en il chantun Son Gagl èn la Polizia chantunala e la guardia da cunfin prontas da retschaiver fugitivs che pudessan vegnir cun trens ord l’Austria. Fin uss sajan mo 10 fugitivs arrivads cun il tren a Buchs, rapporta Radio SRF.

Cumissiun da l'UE sto reagir e reparter ils fugitivs gistamain

La chanceliera tudestga Angela Merkel ed il primminister spagnol Mariano Rajoy pretendan che la cumissiun da l'Uniun europeica reageschia sin la crisa da fugitivs. L'Europa dovria ina politica d'asil cuminaivla. Surtut saja necessari da stgaffir centers da registraziun per ils fugitivs en l'Italia e la Grezia. Plinavant stoppian ils stadis commembers da l'UE definir da cuminanza pajais da derivanza che sajan segirs. Er stoppia dar pussaivladads da repatriar fugitivs.

Merkel ha admonì da reparter ils fugitivs da maniera gista sin l'UE.

RR novitads 12:00 / 14:00 / 15:00