Siglir tar il cuntegn

Header

policists beltgs
Legenda: La polizia belgia ha fatg ina razzia en il quartier Molenbeek a Brüssel. Keystone
cuntegn

Exteriur Polizia belgia arrestescha 7 persunas

7 persunas or dals circuls socials da l’attatgader da Paris identifitgà èn vegnidas arrestadas da la polizia belgia en in quartier da Brüssel.

Attatgaders cun lioms en Belgia

Ch’ils attatgaders, che han chaschunà la mort d’almain 129 persunas e blessà var 350 ulteriuras persunas il venderdi saira a Paris, han lioms cun la Belgia era enconuschent gia in mument.

Avant il local da concert Bataclan a Paris, nua ch’ils attatgaders han mazza almain 89 persunas, han las autoritads franzosas chattà in auto che saja vegnì utilisà dals attatgaders. Il VW Polo aveva in numer da la Belgia.

8 attatgaders èn morts durant las attatgas. In dad els è vegnì sajettà giu da la polizia franzosa. Dus dals attatgaders èn vegnids identifitgads fin uss. Els èn omadus Franzos e vivevan en la regiun da Brüssel.

Stefan Brändle, correspundent a Paris per diversas publicaziuns da lingua tudestga.

3 attatgaders sa siglientads en conturn dal Stade de France

Tenor rapports vuleva almain in dals attatgaders sa siglientar en l’aria en il Stade de France. La guardavan il venderdi saira 80’000 aspectaturs in gieu da ballape amicabel tranter la Frantscha e la Germania. Ad ina detunaziun en l’intern dal stadion n’è quai betg vegnì. Però èn 3 attatgaders sa siglientads en l’aria en il conturn dal stadion. Sper in dad els han ins chattà in pass sirian. Il possessur da quest pass saja vegnì sco fugitiv via l’insla grecca Leros en l’Europa dal vest.

Center islamistic a Brüssel

Arrestà persunas en connex cun l’attentat da Paris, ha la polizia belgia a Brüssel en in quartier che vala sco problematic. Sint-Jans-Molenbeek giascha en il vest da la citad veglia da Brüssel. Ina gronda part da la populaziun è immigrada ed ina gronda part è muslima. Molenbeek cun ses 90’000 abitants vala sco center per l’islamissem extrem. Cun attatgas terroristicas che han in connex cun il quartier Molenbeek saja quai stà da quintar, manegia il correspundent da Brüssel.