Siglir tar il cuntegn

Header

cuntegn

Exteriur Politica tudestga sa mussa consternada

Suenter l'attatga cun ina bumba ad Ansbach en Baviera sa mussa la politica tudestga consternada. Suenter las attatgas dals ultims dis, sajan ins cun ils patratgs tar ils confamigliars da las unfrendas, ha ditg ina pledadra da la regenza a Berlin.

Il primminister da la Baviera, Horst Seehofer ha laschà communitgà che la Baviera fetschia atras dis da sgarschur suenter las attatgas d’Ansbach, Reutlingen e Minca ils ultims dis. Tant la regenza da la Germania, sco era da la Bavaria han dentant punctuà, ch'ins stoppia spetgar giu las examinaziuns da la polizia. Pir lura, cura che las raschuns da las attatgas sajan scleridas, possian ins trair conclusiuns politicas.

Betg metter en general sut suspect fugitivs

La regenza tudestga avertescha en mintga cas da metter fugitivs en general sut suspect da terror. Ils blers terrorists ch'hajan commess attatgas en l'Europa ils ultims mais, na sajan betg stads fugitivs, uschia la pledadra da la regenza a Berlin. Quest fatg correspundia a las examinaziuns actualas. E tenor quellas na saja il privel che fugitivs commettan acts da terror er betg pli grond u pli pitschen che tar il rest da la populaziun.

RR novitads 06:00+

Artitgels legids il pli savens