L'armada tirca ha confermà d'avair mazzà 8 cumbattants da la PKK en ils districts Cizre da la provinza Sirnak. L'agentura da novitads curda Firat rapporta da 9 persunas mazzadas - tranter questas er in buob da 10 onns.
Sco medias che stattan da strusch a la regenza rapportan, saja quai l'operaziun la pli gronda cunter la PKK dapi 10 onns. Sper la polizia sajan engaschads 10'000 schuldads. En pliras provinzas vala in scumond da sortir.
Annunzià attatgas grondas glindesdi
Il primminister da la Tirchia, Ahmet Davutoglu aveva annunzià gia glindesdi passà da vulair far acziuns rigurusas cunter la PKK. Sche necessari, lura vegnia la Tirchia a stgatschar ils cumbattants da quatier a quatier, da chasa a chasa da via a via, uschia Davutoglu.
Mesemna ha Davutoglu confermà las acziuns militaras en la Tirchia dal sidost. Questas continueschin enfin che la regiun saja liberada dals cumbattants che Davutoglu taxescha sco terrorists.
Dapi la fin da l'armistizi tranter l'armada tirca e la "Partida da lavur curda" PKK il fanadur passà, ha la regenza relaschà scumonds da sortir en pliras regiuns.
RR novitads 20:00