Siglir tar il cuntegn

Header

cuntegn

Exteriur Plirs 10'000 demonstreschan en vias e sin plazzas en Spagna

Cun pliras manifestaziuns grondas en pliras citads spagnolas èn plirs 10'000 Spagnols sa radunads. Els pretendan in dialog en la dumonda da la Catalugna che vul daventar independenta. Però era ils unionists spagnols ed ils separatists catalans han demonstrà.

Cun manifestaziuns en pliras citads grondas da la Spagna pretendan ils demonstrants il dialog en la dumonda da la Catalugna. Cun il motto «Hablamos?» («Discurrin nus?») èni sa radunads davant las chasas communalas, sco per exempel era en la chapitala spagnola Madrid e la chapitala regiunala catalana Barcelona. Là hani pretendì che las regenzas discurrian in cun l'auter.

Discurri – ubain demissiunai …
Autur: parolas da demonstrants drizzadas a las regenzas

«Nus vulain ch'i vegn discurrì» è stà d'udir en pliras demonstraziuns. Il primminister da la Spagna Mariano Rajoy ed il schef da la regenza regenza catalana Carles Puigdemont duain ir en tractativas, ubain demissiunar.

Ulteriuras demonstraziuns dad unionists e separatists

Paucs 100 meters dasper la demonstraziun a Madrid ha gì lieu ina demonstraziun dals unionists spagnols. Sin la Plaza Colón èn sa radunads millis persunas per protestar cunter ina separaziun da la Catalugna che vala sco motor economic da la Spagna.

Dapi la votaziun davart il referendum d'independenza dispitaivel datti adina dapli demonstraziuns. L'emprim d'october aveva la regiun Catalugna votà cler per la separaziun – quai cun passa 90% da las vuschs. La Dretgira constituziunala spagnola aveva però gia avant declerà sco illegitima ina tala votaziun.

RR novitads 16:00

Artitgels legids il pli savens