Il 2016 è il dumber d'unfrendas da terror sin l'entir mund sa sminuì per la segunda giada en roda. Numnadamain èn 25'673 persunas mortas tar attatgas da terror. Quai èn 13% pli pac che l'onn avant e 22% pli pac ch'il 2014. Sin fundament da la sconfitta militara da la milissa da terror Stadi islamic (SI) en la Siria e l'Irac, vesa l'Institut per economia e pasch IEP ina midada en il cumbat cunter extremissem islamic.
Aut dumber en l'Europa
Main positivs èn ils resultats per l'Europa. Là hajan ins cun passa 800 morts dumbrà tantas unfrendas da terror sco dapi il 2002 betg pli. Segns per ina diminuziun il 2017 sajan dentant avant maun, manegian ils experts. Plinavant possian las autoritads da segirezza adina pli savens evitar attatgas. Problematicas sajan dentant las attatgas che vegnan executadas cun meds simpels sco vehichels.
Progress en las regiuns zunt periclitadas
La pli gronda activitad da terror hai en l'Africa, en l'Orient Proxim ed en l'Asia. En quatter dals tschintg pajais pertutgads il pli fitg demussa il studi dentant in progress drastic. Sulettamain en l'Irac han ils experts constatà in augment dal dumber da morts da 40%. Responsabla per quai è surtut la milissa da terror Stadi islamic.
RR novitads 09:00