En il pajais sin la Peninsla Araba regia dapi varga quatter onns guerra. Il pajais è il mument partì si tranter las duas partidas principalas da guerra: «Huthi» e «Loialists». Plinavant posseda l'Al Qaida, l'organisaziun terroristica, parts da la terra.
Agid umanitar urgentamain necessari
Il sistem da sanadad è crudà ensemen quasi en l'entir pajais. Varga la mesadad dals ospitals n'èn betg pli en funcziun.
- 80% (24 milliuns) da la populaziun en il Jemen è avisada sin agid umanitar
- 2 milliuns uffants èn alimentads insuffizient
- 4 milliuns èn daventads fugitivs en lur agen pajais
Conflict da pussanza, conflict da religiuns
Ils Loialists èn ina coaliziun internaziunala sut la batgetta da l'Arabia Saudita, che vegnan per exempel er sustegnida dals Stadis Unids (che vulan dentant terminar quai sustegn). Ils «Huthi» èn rebels jemenits che vegnan sustegnids principalmain da l'Iran.
Igl è uschia medemamain in conflict religius tranter las duas grondas gruppas islamicas: Il pajais schiit Iran sustegna ina partida, il pajais sunnit da l'Arabia Saudita sustegna tschella partida.
La fin 2018 hai dà discurs tranter las duas partidas da conflict a Stockholm. Dentant na saja la voluntad da terminar la guerra tar omaduas partidas betg dada. Las partidas èn atgnamain sa cunvegnidas ad ina cunvegna d'armistizi per la citad da port Hodeida. Quai fiss in impurtant pass, perquai ch'ina gronda part da l'agid umanitar vegn transportà sur Hodeida en il pajais Jemen. En vardad datti dentant anc adina blers cumbats en la citad da port.