Siglir tar il cuntegn

Header

cuntegn

Exteriur Pli gronda attatga da cyber sin democrats en ils Stadis Unids

Na be e-mails ma er datas d’electurs èn para vegnidas enguladas giu dals computers dals democrats en ils Stadis Unids. Experts fan la responsabla la Russia.

L'attatga da hackers sin ils democrats americans è pli vasta che supponì. Tenor l'agentura da novitads Reuters n’è betg sulet la rait dal team dal cumbat electoral da Hillary Clinton pertutgà, mabain er il comité dal cumbat electoral che rimna ils daners per l’emprima dunna nominada sco candidata per il presidi dals Stadis Unids. Omaduas attatgas vegnian intercuridas, ha ditg in pledader dals democrats americans.

Indizis sin hackers russ

Tge datas ch'ils hackers han propi engulà, n'è anc betg cler. Ma cura che visitaders vulevan vegnir sin la pagina d’internet dal comité per il cumbat electoral dals democrats vegnivan els sviads sin ina pagina ch’era probabel vegnida stgaffida da hackers russ cun relaziuns cun tar la regenza da la Russia.

Parallelas cun l’affera dad e-mail

Las attatgas han gronda sumeglientscha cun las atticas sin la suprastanza da la partida democratica. Là avevan ils hackers engulà las datas da radund 20’000 e-mails. Ord da quests mails era quai vegni conuschent che la suprastanza era cunter ina candidatura da Bernie Sanders e che la suprastanza favurisava ina candidatura da Hillary Clinton, era sche quella avess dad esser formalmain neutrala.

Moscau suspectà

Il team Clinton ed ils experts d’IT fan la Russia responsabla per las publicaziuns dals e-mails. Moscau refusa questas reproschas. Il mument investighescha l’FBI en omadus cas.

RR novitads 08:00

Artitgels legids il pli savens