Plans per pausa da cumbat en Siria fruntan sin sceptica

I para da dar in zic speranza per pasch en la Siria. A Minca han 17 pajais – tranter quels ils Stadis Unids e la Russia - prendì en mira ina pausa da cumbat aifer in’emna. L'opposiziun siriana e rebels beneventan bain quests plans, sa mussan a medem mument però sceptics envers quels.

Staffan de Mistura, l'intermediatur spezial da l'ONU per la Siria.

Legenda da maletgs: Visualisar il conflict: Staffan de Mistura, l'intermediatur spezial da l'ONU per la Siria, mussa ina carta da la Siria. Keystone

Il minister da l’exteriur dals Stadis Unids, John Kerry, ha confermà la finamira per questa pausa da cumbat. Tant l'opposiziun ed ils rebels en Siria sco er la Tirchia beneventan ils plans - però betg senza dubis.

Sergei Lavrov, il minister da l'exteriur da la Russia (san). e ses collega d'uffizi dals Stadis Unids, John Kerry (dre.)

Legenda da maletgs: Represchentants enconuschents: Sergei Lavrov, il minister da l'exteriur da la Russia (san). e ses collega d'uffizi dals Stadis Unids, John Kerry (dr... Keystone

Mangiativas e medicaments per civilists

Tenor John Kerry pudess la pausa da cumbat vegnir realisada aifer in’emna. Dentant ston ils detagls da quest'interrupziun anc vegnir fixads.

La gruppa da sustegniment per la Siria - a la quala era l'Iran e l'Arabia Saudita appartegnan - è plinavant sa cunvegnida ad agid umanitar che cumpiglia mangiativas e medicaments per la populaziun civila. Nagina pausa duai dar per las attatgas cunter il Stadi Islamic.

Opposiziun beneventa scepticamain la pausa

L'opposiziun en la Siria ha beneventà la pausa da cumbat concludida a Minca precautamain. En il medem mument ha ella dentant era exprimì dubis.

Da principi saja ina pausa da cumbat da beneventar, ma ins prefereschia ovras e betg pleds, ha in pledader accentuà ed agiuntà: «D'empermischuns essan nus unfis».

Medemamain sceptics sa mussan er ils rebels. Uschia è in cumandant dals rebels da l’avis, ch’il reschim en Siria e lur alliads russ sajan persvas da destruir l’entir nord d’Aleppo, avant ch’els fetschian ina pausa da cumbat a terra.

Russia duai terminar attatgas ord l'aria

Mevlüt Cavusoglu, il minister da l'exteriur da la Tirchia, taxescha ils plans da la gruppa da lavur sco pass impuratant per schliar il conflict. Uss stoppian las attatgas ord l'aria e sin civilists vegnir terminadas. Er dovria quai agid umanitar.

Ina premissa per in armistizi saja perquai, che la Russia termineschia lur attatgas cun aviuns. La Tirchia tema numnadamain ch'ulteriurs tschientsmillis fugitivs arrivian en lur pajais, sch'ils bumbardaments ord l'aria cuntinueschan.

RR novitads 06:00 / 11:00

SI ha duvrà armas chemicas

La milissa terroristica Stadi Islamic ha gia duvrà pliras giadas armas chemicas. Quai di il servetsch secret american CIA. Il Stadi Islamic saja era abel da producir sez pitschnas quantitads da gas da clor ed iperit.

Il directur general da l'organisaziun per scumond d’armas chemicas, Ahmet Üzümcü, aveva gia declerà l'emna passada ch'ins suspecteschia ch’il SI possia producir sez tals gas. Anteriurs schuldads iracais ch'eran cumpigliads al program d'armas chemicas da Saddam Hussein lavuran oz per il Stadi Islamic.