Plan da pasch porta speranza per la Siria

Per la Siria datti in nov plan da pasch ch'il Cussegl da segirezza da l'ONU ha approvà.

Il Cussegl da segirezza da l'ONU durant ina seduta.

Legenda da maletgs: La ONU pudess dar al process da pasch ina legitimaziun da dretg internaziunal. Keystone

Ils 15 pajais dal cussegl han sustegnì unanimamain ina resoluziun correspundenta. Quella prevesa gia il schaner discurs tranter la regenza siriana e l'opposiziun, davart in armistizi e per furmar ina regenza transitorica. Vinavant pretenda la resoluziun da tut las partidas da la guerra burgaisa, da desister per immediat d'attatgas sin civilists e sin indrizs civils.

La resoluziun sa basa sin ils discurs davart la Siria ch'avevan gì lieu avant in temp a Vienna.

Svizra spera sin pasch durabla

La Svizra beneventa la resoluziun da l'ONU davart la Siria. Quai ha communitgà il Departament federal d’affars exteriurs (EDA). El spera che la resoluziun possia fullar via per ina pasch durabla en la Siria. Per la crisa en la Siria dettia sulet ina schliaziun politica. Per il process da pasch mettia la Svizra vinavant a disposiziun ses buns servetschs.

RR Novitads 23:00