Siglir tar il cuntegn

Header

cuntegn

Exteriur «Per oz èn la Germania e la Svizra soras»

La chanceliera tudestga Angela Merkel fa oz ina visita uffiziala en Svizra. Sin il program stattan discurs cun ils 4 cussegliers federals, Simonetta Sommaruga, Didier Burkhalter, Doris Leuthard e Johann Schneider-Ammann. Tema central vegn ad esser las relaziuns bilateralas cun l'UE.

audio
Simonetta Sommaruga descriva la relaziun tranter la Svizra e la Germania
ord Novitads dals 03.09.2015.
laschar ir. Durada: 16 Secundas.

«Per oz èn la Germania e la Svizra soras, ha ditg la presidenta da la Confederaziun Simonetta Sommaruga a la conferenza da medias.» Quai n'haja però da far nagut direct cun la quota da dunnas, uschia Sommaruga vinavant.

Sche la Svizra veglia cuntinuar la via bilaterala, stoppia questa via vegnir renovada. La Svizra stoppia perquai betg mo negoziar cun l'UE davart la libra circulaziun da persunas mabain er davart la cunvegna da basa instituziunala, il dossier d'energia u il dossier da perscrutaziun.

I vegn grev, ma nus vegnin a far tut per accumpagnar quest process a moda constructiva.
Autur: Angela Merkel chanceliera tudestga
audio
Angela Merkel vul far tut per sustegnair la via bilaterala
ord Novitads dals 03.09.2015.
laschar ir. Durada: 12 Secundas.

Merkel da sia vart ha engrazià per il discurs ed il bainvegni amicabel. Il pricipi da la libra circulaziun da persunas saja in principi da basa da l'UE, uschia Merkel. Il medem mument ha ella er acceptà la votaziun dal pievel svizzer davart l'immigraziun da massa. «I vegn grev, ma nus vegnin a far tut per sustegnair quest process a moda constructiva.»

Ordavant era la chanceliera vegnida beneventada cun onurs militaras sin il Münsterplatz a Berna. Ensemen cun Simonetta Sommaruga è ella passada sper la furmaziun d'onur da l'armada svizra.

audio
Angela Merkel engrazia per rumantsch
ord Novitads dals 03.09.2015.
laschar ir. Durada: 13 Secundas.

Merkel lauda procedura d'asil en Svizra

Las regenzas da la Germania e da la Frantscha sajan sa cunvegnidas sin ina iniziativa communabla per quotas liantas per la repartiziun dals fugitivs en l'UE, uschia Angela. La chanceliera ha plinavant titulà il proceder d'asil da la Svizra sco exempel per l'UE sco era per la Germania. Quai tant cun reparter ils fugitivs sco era cun elavurar las dumondas d'asil.

RR novitads 12:00

Artitgels legids il pli savens