Per ir dal Danemarc en la Svezia dovri puspè in pass

A partir dal glindesdi datti puspè controllas da pass al cunfin tranter il Danemarc e la Svezia, e quai en trens, bus e nav-feras.

Ina controlla da pass sin ina staziun en il Danemarc.

Legenda da maletgs: Avant ch’entrar en il tren che va dal Danemarc en la Svezia hai num mussar il pass. Keystone

La regenza svedaisa vul uschia limitar l’aut dumber dals requirents d'asil. La Svezia sa senta pli e pli fitg surdumandada dals requirents ch’arrivan en il pajais. Ina nova lescha lubescha a la regenza d'obligar interpresas da transport da far controllas da pass.

Ils gestiunaris da viafiers e nav-feras dal Danemarc avevan crititgà questa decisiun cun vehemenza. Els han avertì da custs pli auts e da pli lungs temps da viadi.

Sco reacziun sin la decisiun da la Svezia fa il Danemarc davent d'immediat controllas da pass limitadas. La decisiun dal pajais vischin sforzia els da prender questa mesira, ha ditg il primminister danais Lars Lökke Rasmussen.

RR Novitads 10:00/14:00