Siglir tar il cuntegn

Header

cuntegn

Exteriur Pendiculara al Mont Blanc va puspè

Al Mont Blanc han 33 persunas stuì passentar la notg en gondlas da quatter persunas. La pendiculara ha gì la gievgia saira in defect ed uschia stuì vegnir franada. Entant funcziuna la pendiculara puspè.

Il defect vid la pendiculara al Mont Blanc han ins pudì reparar e las 33 persunas ch’han passentà l’entira notg en las gondlas èn puspè giun plaun.

La pendiculara sa chatta sin in’autezza da pass 3’000 meters. La raschuna per la panna èn stads cabels scumbigliads, quai tenor l’agentura da novitads AFP. Daco che quai è dentant capità n’è anc betg enconuschent.

Uffant da 10 onns en ina cabina

77 persunas avevan ins gia pudì deliberar ord las cabinas la gievgia saira. Quai èn dapli persunas che quai ch’i era enconuschent a l’entschatta, er perquai che salvaders han pudì laschar giu persunas cun la suga. Plinavant èn plirs helicopters stads en servetsch.

A las persunas ch’èn stadas a ferm en las gondlas è vegnì mess a disposiziun cuvertas, aua e mangiativas d’energia. En ina da las cabinas sa chattava er in uffant da 10 onns. In policist ha passentà la notg là cun la famiglia da l’uffant.

«Lungas uras»

Las persunas salvadas èn vegnidas transportads da la vart taliana, sco Roberto Francesconi, mainafatschenta da las pendicularas talianas Skyway dal Mont Blanc ha declerà. Da là sajan ellas idas davent cun bus. Ils turists pertutgads, oravant tut Franzos, Talians ed Americans, sajan en gamba.

La pendiculara che collia en il massiv dal Mont Blanc l’Aiguille du Midi cun la Pointe Helbronner.
Legenda: La pendiculara collia en il massiv dal Mont Blanc l’Aiguille du Midi cun la Pointe Helbronner. SRF

In dals salvads ha raquintà a l’emettur da radio franzos Bleu Pays co l’entira acziun è ida. La descensiun cun suga cun l’helicopter saja stada fitg pretensiusa. «Jau hai serrà ils egls per patratgar vid insatge auter», di l’um. En las cabinas sajan las persunas adina vegnidas pli e pli malpazientas. «La davos’ura è stada lunga, fitg lunga.» Il Mont Blanc en Frantscha al cunfin cun l’Italia è cun 4’810 meters il pli aut culm da las Alps.

Plirs helicopters èn acziun

La pendiculara maina sur ina distanza da tschintg kilometers sin in’autezza da maximal 3’842 meters. En tschertas parts èn las gondlas 400 meters ord il plaun.

La pendiculara collia en il massiv dal Mont Blanc l’Aiguille du Midi cun la Pointe Helbronner. Mintga gondla ha plaz per quatter persunas. Vid la acziun da salvament èn stads en servetsch quatter helicopters da la Frantscha e l’Italia.

RR novitads 06:00

Artitgels legids il pli savens