Paul Allen aveva fundà il 1975 il gigant da software Microsoft ensemen cun ses ami d'uffanza Bill Gates. Otg onns pli tard ha el bandunà l'interpresa. Cun ina facultad stimada da var 20 milliardas francs tutgava Paul Allen tar ils pli ritgs umans dal mund. Sper sias fatschentas è el s'engaschà per l'ambient, la furmaziun e la scienza. Plinavant era el possessur dal team da football Seattle Seahawks e l'equipa da ballabasket Portland Trail Blazers.
Pers il cumbat cunter il cancer
Pir avant intginas emnas aveva Allen communitgà ch'el cumbattia danovamain cunter il cancer. Avant nov onns aveva el gia cumbattì cun success il cancer. Ses ami d'uffanza e fatschenta Bill Gates è sa mussà commuventà. Senza Paul Allen na fissi in tal success en la branscha da software mai stà pussaivel. El perdia in da ses pli vegls e megliers amis.
RR novitads 06:00