Siglir tar il cuntegn

Exteriur Pauc sustegn per Habib Essid

En la Tunesia ha il schef da regenza Habib Essid pers ina votaziun da fidanza en il parlament. 118 dals 191 parlamentaris preschents han votà cunter Essid.

Habib Essid tegn il maun sin il frunt e guarda engiu - la foto è vegnida fatga curt avant il votum da confidanza dal parlament tunesian.
Legenda: Habib Essid curt avant il votum da confidanza. Keystone

Sulettamain trais represchentants han votà per Essid. 27 èn s'abstegnids da la vusch. Parts da l'opposiziun han boicottà l'elecziun. En vista al sustegn pli e pli flaivel per Essid è il resultat nagina surpraisa.

Crisa d'economia è la culpa

Essid è vegnì sut squitsch perquai ch'igl n'è betg gartegià a sia regenza da cumbatter la crisa da l'economia e l'auta dischoccupaziun. Essid è stà in onn e mez en uffizi. El ha ussa 10 dis temp per far consultaziuns davart sia successiun.

RR novitads 12:00