- Tar in incendi en in center da cumpra en la citad da Kemerowo èn almain 64 persunas mortas. Passa 40 ulteriuras èn vegnidas blessadas.
- L'incendi è rut or datiers dad ina sala da kino en la quart'auzada. La raschun n'è anc betg clera.
- Entant ha la polizia arrestà trais persunas.
Tranter ils arrestads saja er il directur dal center da cumpra en la citad Kemerowo. Il fieu è rut ora la dumengia saira en la quart'auzada dal bajetg. Quantas persunas ch'eran lura en il center da cumpra n'è betg cler. Almain 64 persunas èn mortas, tranter quellas er plirs uffants. Passa 40 persunas èn blessadas. Tenor la protecziun da catastrofas èn en total 64 persunas sparidas, tranter questas èn er ils morts anc betg identifitgads.
Raschun da l'incendi betg clera
Il center da cumpra saja stà bain frequentà la dumengia. Quai rapportan las autoritads localas. Tenor medias localas sajan passa 200 persunas vegnidas salvadas ord il center. En il center da cumpra dettia dasper butias er plirs kinos, restaurants, ina sauna ed ina pista da bolas. Daco che l'incendi è rut or, n'è il mument anc betg cler. Las autoritads investigheschan pervi da violaziun da las prescripziuns da segirezza.
Putin condolescha
Il center ha avert sias portas l'onn 2013. Il president russ Wladimir Putin ha condolà a las famiglias da las unfrendas. Tenor ses pledader haja Putin tramess forzas da salvament cun equipament spezial da Moscau a Kemerowo.
Kemerowo è en il vest da la Sibiria, radund 3000 kilometers davent da la chapitala Moscau. Passa 500'000 vivan en la citad.
RR novitads 07:00