Siglir tar il cuntegn
Inhalt

Exteriur Passa 40 morts tar attentat en Siria

Ils attentats èn stads drizzads vers bajetgs da la segirtad dal stadi e dal servetsch secret militar. Tar ils morts sa tractia da collavuraturs dal servetsch secret, era in uffizier dals rangs auts saja tenor il post d'observaziuns sirian per ils dretgs umans, tranter las unfrendas.

Purtret da ruinas en la citad Homs.
Legenda: La citad da Homs ha patì d'attatgas sin plirs bajetgs militars. Keystone

Tenor il post d'observaziuns sirian per dretgs umans haja gì almain sis attentaders. Plirs dad els sajan sa siglientads davant las sedias da la segirtad naziunala e dal servetsch secret militar. Quai ha rapportà il schef dal post d'observaziun, Rami Abdel Rahman.

Il post d'observaziun retira sias infurmaziuns d'activists en Siria, lur indicaziuns èn strusch pussaivlas da verifitgar ord vista independenta. La televisiun statala ha era rapportà dals attentats, dentant senza numna ina cifra d'unfrendas.

La segirezza naziunala ed il servetsch secret èn renumads e temids. Homs è la terz gronda citad en Siria e chapitala da la provinza cun il medem num. Ella è lung temp stada sut la pussanza da rebels, ma uss puspè regida da truppas da la regenza.

Homs ha ils ultims onns patì fitg d'attentats dal Stadi Islamic (SI). Avant in onn eran mortas 64 persunas d'in attentat dubel. Ils blers da quels èn stads civilists.

RR novitads 09:00