Siglir tar il cuntegn

Header

cuntegn

Exteriur Passa 240 unfrendas tar terratrembel en il Mexico

Suenter il terratrembel da 7,1 en la vischinanza da la chapitala Mexico City è il dumber dals morts entant creschì sin almain 248 persunas.

  • En il Mexico ha stremblì la terra cun ina fermezza da 7,1 sin la scala da Richter.
  • L'epicenter è stà radund 120 kilometers en il sidost da la chapitala Mexico City.
  • Bunamain 250 persunas èn mortas.
  • Passa quatter milliuns èn senza current electric.
  • Cunquai che blers bajetgs èn sballunads, quintan las autoritads cun ulteriuras unfrendas.

audio
Terratrembel en il Mexico
ord Actualitad dals 20.09.2017.
laschar ir. Durada: 41 Secundas.

L'epicenter è stà 120 kilometers en il sidost da la chapitala Mexico City. Suenter il terratrembel cun ina fermezza da 7,1 èn millis d'abitants da la chapitala currids en panica sin las vias.

En la regiun da Mexico City vivan radund 20 milliuns persunas. Tenor las autoritads eran persunas bloccadas en chasas che brischavan. Maletgs mussan ferm fim e parts da bajetgs ch’èn crudadas a terra.

Il president dal Mexico Enrique Peña Nieto ha clamà ensemen il cussegl d’urgenza naziunal. Ins stoppia survegnri ina survista da la situaziun per pudair prender mesiras, ha Nieto communitgà via Twitter. L’eroport da la chapitala è serrà.

Segund ferm terratrembel il settember

Pir ils 7 da settember aveva in terratrembel cun la fermezza da 8,2 tutgà il Mexico, radund 100 persunas eran mortas. Ed avant exact 32 onns – ils 19 da settember 1985 – ha il Mexico patì d’in dals pli gronds terratrembels da sia istorgia. Lura eran mortas bunamain 10’000 persunas.

Duas uras avant l'ultim terratrembel han las autoritads anc fatg in exercizi da catastrofas cun evacuaziuns.

RR novitads 22:00++

Artitgels legids il pli savens