Il ministeri da defensiun discurra da passa 100 morts da l'attatga dals Taliban. Ils Taliban sezs discurran da passa 500 morts e blessads. In represchentant da l'armada aveva avant anc discurri dad almain 70 morts ed 80 blessads. Il militar dals Stadis Unids aveva discurrì d'almain 50 schuldads morts. Balch tutgava enfin uss tar las provinzas plistost segiras da l'Afghanistan.
L'attatga da venderdi ha valì ad ina basa militara datiers da la chapitala da la provinza Balch, Masar-i-Scharif. Là maina l'armada da la Republica Federala Tudestga in champ militar. Schuldads germans na sajan nagins vegnids blessads.
Unifurmas uffizialas, documents falsifitgads
Tenor in represchentant da l'armada afghana hajan ils Talibans purtà unifurmas da l'armada afghana e sajan charrads cun autos dal militar sco era cun documents falsifitgads. A l'entschatta da lur attatga hajan els envidà ina racheta a l'entrada da la basa. 10 Talibans hajan lura attatgà tranter auter schuldads e uffiziers durant l'oraziun dal venderdi en ina moschea sin la basa militara.
Ils Taliban hajan declerà che quatter da lur commembers hajan lavurà pli bud sco schuldada sin la basa ed hajan perquai enconuschì bain la basa. Ils Taliban hajan plinavant publitgà purtrets dals attatgaders. Las indicaziuns n'hajan dentant betg pudì vegnir verifitgadas immediatamain.
La segirezza en il pajais è sa pegiurada rapidamain dapi che la NATO ha declerà ses cumbat en il pajais sco finì la fin dal 2014. Las bleras truppas n'èn betg pli en il pajais. L'engaschament da cumbat è sa midà en in da furmaziun.
RR novitads 10:00