En dumondas centralas sco la politica da fugitivs, dal clima e dal traffic na dettia er suenter trais emnas anc adina nagin cumpromiss. Oriundamain eri planisà che las partidas da la CDU/CSU, la FDP ed ils Verds veglian decider oz, sch’i dettia tractativas per ina coaliziun da regenza u betg.
Ils secretaris generals da las partidas sajan sa cunvegnids tar ina preambel per in document da sondaziun. Ma tar ina massa puncts sajan ins anc en discussiun. Per exempel sajan ins stà d'accord ch'ins veglia bajegiar giu il «supplement da Soli». Ma la data da finiziun cura ch'i duai esser a fin u en tge pass ch'el duai vegnir reducì sajan puncts da dispita. Il «supplement da Soli» sco era da distgargiar famiglias ha dentant per tuts prioritad.
Dispita per electricitad da charvun
Tar il tema clima haja l'Uniun fatg amogna als Verds da reducir enfin l'onn 2020 dapli ch'ils trais enfin tschintg gigawatt. Angela Merkel haja sco i para fatg amogna enfin set gigawatt. Ils Verds vulan dentant almain otg enfin 10 gigawatt pli pauc electricitad da charvun.
Consentiment tar populaziun va a perder
Pli ditg ch'ils discurs davart ina coaliziun cuzzan e pli pauc consentiment ch'ina tala coaliziun da Jamaica ha tar la populaziun. Be anc 50% dals votants beneventassan ina coaliziun da la CDU/CSU cun la FDP ed ils Verds, uschia il nov barometer da ZDF. Quai èn 7% pli pauc che anc a l'entschatta dals discurs da sondagi.
RR novitads 09:00