Parlament regiunal catalan sa raduna, malgrà scumond

En Spagna sa raduna il parlament regiunal catalan, schegea che la dretgira constituziunala da la Spagna aveva scumandà la sesida dal parlament.

Protests cun la bandiera d'independenza catalana.

Legenda da maletgs: Protests cun la bandiera d'independenza catalana. Keystone

Il parlament regiunal catalan a Barcelona decida oz venderdi d’ina pussaivla independenza da la Catalugna. Quai malgrà il scumond da la Dretgira constituziunala da la Spagna.

Da proclamar l'independenza da la Catalugna dal stadi spagnol saja mo anc ina dumonda dal temp, ha ditg il schef da la regenza regiunala catalana, Carles Puigdemont, a l'emettur BBC.

Regenza s'exculpa per acziun da polizia durant referendum

Dumengia passada aveva la populaziun catalana votà en in referendum regiunal cler per la separaziun da la Spagna. Quest referendum aveva la Dretgira constituziunala spagnola però declerà sco illegal. Quai sa basond sin leschas spagnolas che fixeschan la Spagna sco unitad nundividibla.

Entant è s'exculpada la regenza spagnola per l'acziun da polizia durant il referendum da la dumengia passada. Ella saja pertscharta che persunas sajan vegnidas pitgadas, stuschadas e per part anc adina en l'ospital.

Consequenzas era per demonstrants dal settember

A Madrid aveva il tribunal suprem interrogà il schef da la polizia catalana sco er auts uffiziers da la polizia. Era envidà eran dus manaders dal moviment d’independenza catalana. Ad els vegn renfatschà d’avair clamà a la revolta.

Las investigaziuns stattan en connex cun las demonstraziuns a Barcelona dals 20 e 21 da settember. La polizia spagnola ha communitgà ch’ella saja vegnida impedida tar questas demonstraziuns.

RR novitads 14:00