Siglir tar il cuntegn

Header

Navigaziun

Pervi da l'evacuaziun datti collonnas avant l'eroport da Paris-Orly.
Legenda: Pervi da l'evacuaziun datti colonnas avant l'eroport da Paris-Orly. Keystone
cuntegn

Exteriur Paris-Orly – procura publica d'anti-terror surpiglia inquisiziuns

L'eroport Paris-Orly è vegnì evacuà oz avantmezdi suenter che la polizia ha sajettà giu in um. L'um haja pruvà d'engular in'arma d'in schuldà e saja currì en ina butia. Policists hajan lura mazzà l'um. Plaunet turna il traffic aviatic puspè a la normalitad.

Quai ha ditg il pledader dal ministeri da l'intern franzos a l'agentura da novitads AFP. I n'haja dà nagins blessads. Per sclerir las circumstanzas dal fatg han ils responsabels evacuà l'eroport, rapporta in emettur da televisiun franzos. Il traffic aviatic è interrut. Spezialists han intercurì sche l'um aveva material explosiv cun el, dentan chattà nagut. Cunquai ch'i existia in suspect da terror, haja la procura publica d'anti-terror surpiglià las investigaziuns.

L'eroport Orly sa chatta en il sid da Paris. Igl è il segund grond eroport da la chapitala suenter la plazza aviatica Charles de Gaulle.

Spezialists da la polizia han drizzà en ina zona da segirezza ed examineschan il lieu da la sajettada.
Legenda: Spezialists da la polizia han drizzà en ina zona da segirezza ed examineschan il lieu da la sajettada. Keystone

Il schuldà al qual l'um ha pruvà d'engular l'arma tutga tenor las agenturas da novitads tar la missiun d'anti-terror. Avant intginas emnas aveva ina patruglia da militar sajettà sin in um datiers dal museum Louvre a Paris perquai che quel aveva attatgà la patruglia.

Pervi dal privel da terror patruglieschan en differents lieus, principalmain staziuns da tren, da la metro, eroports e plazzas publicas, schuldada da l'armada franzosa.

Attatgà glieud en ina bar e policists

Tenor il minister da l'intern franzos Bruno Le Roux haja l'attatgader gia avant ch'el è rivà sin la plazza aviatica engulà in auto e smanatschà glieud en ina bar. Plinavant haja el sajettà sin in policist tar ina controlla d'identitad. Il policist saja stà en l'ospital, na saja dentant betg blessà grevamain.

RR novitads 11:00 +